Афғонистон Исломий Иморати Вашингтоннинг АҚШ қўшинлари мамлакатдан чиқиб кетганидан сўнг Афғонистонда қолдирган ҳарбий техникасини қайтариш талабини муҳокама қилишдан бош тортди.
АИИ Ташқи ишлар вазирлигининг вакили Абдул Қаҳҳор Балхий қолган қурол-яроғ ва ҳарбий техника Афғонистон ҳукуматининг мулки эканини таъкидлаб, шу сабабли уларни қайтариш масаласи ҳатто муҳокама қилиниши ҳам мумкин эмаслигини билдирди.
Шунингдек, у АҚШ техникасини қайтаришни талаб қилишдан олдин ўз уруши оқибатлари — инсонларнинг ҳалок бўлиши ва Афғонистоннинг катта қисмининг вайрон қилиниши учун жавоб бериши кераклигини айтди.
«Америкаликлар кўп ишларни қилди. Улар кўплаб инсонларни ўлдирди ва мамлакатнинг катта қисмини вайрон қилди. Аввало, бунинг учун товон тўлашлари керак эмасми?»
АҚШ қўшинлари 2021 йилда Афғонистондан чиқиб кетганидан сўнг мамлакатда бронетехника, қурол-яроғ, ўқ-дорилар, вертолётлар ва бошқа ҳарбий техника қолган.
Ушбу қурол-яроғ ва техника АИИ назоратига ўтди. Аввалроқ Трамп Афғонистонда қолдирилган ҳарбий техникани қайтаришни бир неча бор талаб қилган эди.
Кобулда эса бу талаблар ҳақиқатдан йироқ ва асоссиз деб баҳоланди.
