Арманистон Бош вазири Никол Пашинян мамлакатда ҳарбий тўнтаришга бўлган ҳаракат ҳақида хабар қилди. Пашиняннинг баёноти, Арманистон Бош штаби Пашинянга ва мамлакатнинг амалдаги ҳукумати зудлик билан истеъфога чиқишини талаб қилувчи ультиматумни қўйганидан кейин эълон қилинди.
Ҳаммаси Россиянинг «Искандер» баллистик ракеталари самарасиз, амалда фойдасиз деб Пашинян айтганидан кейин бошланди.
Унинг фикрига кўра арманлар Тоғли Қорабоғ урушида рус қуролларининг самарасизлиги туфайли мағлуб бўлишди. Арманистон армияси Бош штаби Пашиняннинг фикрига қарши чиқди. Бунга жавобан Пашинян, Бош штаб бошлиғи Oник Гаспарян ва Қуролли Кучлар Бош штаби бошлиғининг биринчи ўринбосари Тиран Хачатрянни ишдан бўшатди. Улар Пашиняннинг искандерлар ҳақидаги гапларини ўринсиз деб билишганди. Пашинян 1in.am порталига берган интервьюсида собиқ президент Серж Саркисяннинг гапларини изоҳлаб шундай дейди, “2020 йил кузида Тоғли Қорабоғдаги ҳарбий ҳаракатлар пайтида Ереван Россиянинг ракета тизимларидан фойдаланиши мумкин эди. Ўша вақтда аксар ракеталар портламади, балки ўн фоиз қисмигина портлади”.
Арманистон Тоғли Қорабоғида 16 та ракета тизими, шу жумладан «Искандер» ракеталари бор эди. Ўтган йилнинг ноябр ойида Арманистоннинг бош ҳарбий инспектори лавозимидан истеъфога чиққан генерал-полковник Мовсес Акопян жанглар пайтида Арманистон ҳарбийлари Искандерлардан фойдаланганини айтди: «Ҳа, улардан фойдаланилган, аммо қайси йўналишда бўлганлигини айта олмайман. » Айни пайтда Ереванда Пашинян тарафдорлари ва мухолифлари ўртасида тўқнашувлар бошланди. Арманистон ҳудудида вазиятнинг кескинлашуви кузатилмоқда. Арманистоннинг ҳозирги Бош вазирининг тарафдорлари ҳам, мухолифлари ҳам шаҳар майдонларида тўпланишмоқда, натижада жуда жиддий тўқнашувлар рўй бериши мумкин.
