Салибчиларнинг мусулмон ўлкаларига қилган юришлари вақтида ўша вақтдаги уламолардан бўлган ибн Жавзия роҳимаҳуллоҳ Дамашқдаги масжидда инсонларга хутба қилиб шундай деган эди:
«Эй инсонлар! Сизларга нима бўлди, нега сизлар ўз динингизни эсдан чиқардингиз, нега сизлар ўз иззатингиз ва ғурурингизни унутиб, Аллоҳнинг динига ёрдам беришдан тўхтадингиз ва У ҳам сизларни ёрдамсиз ташлаб қўйди?! Наҳот сизлар иззат мушрикларга тегишли деб ўйлаб қолдингиз, ваҳоланки иззат Аллоҳга, Росулига ва мўминларга хос бўлса? Сизларга вайл бўлсин, наҳот оталарингиз қон тўккан ерда Аллоҳнинг душмани хотиржам юришини ўз кўзингиз билан кўришингиз сизларга оғир ботмаса ва наҳот бундан юрагингиз сиқилмаса? Бу ифлос душман сизни хорлаб ўзига қул қилса, ваҳоланки сизлар Ер юзига ҳалифа ва ҳокимлик қилган бўлсангиз. Наҳот ўз биродарларингизни душманлар муҳосара қилиб, уларни хоҳлаганча уқубатга солиб хорлаши жасадингизни сескантириб, душманга қарши нафрат ва ғайратингизни оширмаяпти? У ерда биродарларингиз урушнинг барча заҳмату-қийинчиликларини ўз таналарида тотсалару, қандай қилиб сизлар бу ерда хотиржам еб-ичиб, дунё неъматлари билан роҳатланиб юрибсиз?!
Эй инсонлар! Жанг бошланди ва чақирувчи Жиҳодга чақирди. Агар сизлар жиҳодга чиқмасангиз, у ҳолда йўлни аёлларга бўшатиб беринг, улар жанг қилсинлар. Эй, салла-ю соқоллик аёллар, уйингизга боринглар ва сурмани олинглар. Шундай эмасми?
Юганларни ушланглар ва отларга!
Бу юган-у қамчилар нимадан қилинганини биласизми? Уларни аёллар ўз сочларидан тўқишяпти ва улар бундан ортиғига қодир эмаслар. Булар ўз уйларида ўтирган афифа аёлларнинг соч ўрамларидир. Улар ўз сочларини кесиб, ундан жиҳод учун қамчи ва юган тайёрладилар, чунки севги-муҳаббат вақти ўтди ва Аллоҳ йўлидаги, ўз ватани ва муқаддасотларини ҳимоя қилиш учун муқаддас жанг вақти келди.
Агар сизлар отларни эгарламасангиз, бу қамчиларни олинглар ва уларни ўзингизга соч қилиб олинглар. Наҳот қалбларингизда заррача ғурурингиз қолмаган бўлса?!»
У одамларнинг бошларига шу юган ва қамчиларни отиб юборди ва деди:
«сизларнинг бошингизга шу масжид ағанасин! Юрак қайғу ва аламдан ёняпти! Ҳақиқатан ҳам эркаклар ўз ғурур-мардлигини йўқотдилар».
Аллоҳ у кишига раҳм қилсин. Бу сўзларни у қўл остиларида Андалусия ўлкалари бўлган мусулмонларга, жиҳод фарзи-кифоя бўлганда айтган эдилар.
Агар у киши мусулмонларнинг ҳозирги ҳолатини кўрганларида, бизларга нима деган бўлар эдилар?!
